काठमाडौंः कैलालीको धनगढीमा नेकपा (एमाले) का दुई पक्षबीच विवाद हुँदा कुटाकुट भएको छ ।

आज दिउँसो प्रदेश पार्टी कार्यालयमा प्रदेश इन्चार्जको नेम प्लेट राख्ने विषयमा विवाद हुँदा केपी शर्मा ओली र माधवकुमार नेपाल समूहका कार्यकर्ता बीच कुटाकुट भएको हो ।

पार्टी कार्यालयमा प्रदेश इन्चार्जमा लेखराज भट्टको ‘नेम प्लेट’ राखेपछि नेपाल समूहका कार्यकर्ताहरुले ‘नेम प्लेट’ तोडफोड गरेका थिए । उनीहरुले नेकपा एमालेको सुदूरपश्चिम इन्चार्ज भीम रावल रहेको भन्दै भट्टको नेम प्लेट हटाए । यस क्रममा ओली समूह र नेपाल समूहका कार्यकर्ता नाराबाजीमा उत्रिएका थिए । विवाद बढ्दै गएपछि कुटाकुट भएको हो ।


प्रदेश पार्टी कार्यालयमा नेकपाको ब्यानर हटाएर नेकपा एमालेको ब्यानर राख्ने कार्यक्रम तय भएको थियो । ११ बजे नेकपा एमालेको ब्यानर लिएर प्रदेशका अध्यक्ष कर्ण थापा पार्टी कार्यालयमा पुगेका थिए ।

प्रदेश अध्यक्ष थापा कार्यालय प्रवेश गर्दासम्म नेकपाको ब्यानर हटाएर एमालेको ब्यानर राखिसकिएको थियो । नेपाल समूहका कार्यकर्ताहरुले ब्यानर राखेका थिए । थापा प्रवेश गर्दा प्रदेश पार्टी कार्यालयमा अध्यक्षको कार्यकक्ष बाहिर भानुभक्त जोशी र इन्चार्जमा भीम रावलको नेम प्लेट थियो । त्यही समयमा दुवै जनाको नेम प्लेट निकालियो । ती दुई स्थानमा कर्ण थापाको र लेखराज भट्टको नाम राखिएको थियो । त्यस लगत्तै नेपाल समूहका कार्यकर्ताहरुले लेखराज भट्टको नेम प्लेट हटाएका थिए । उनीहरुले पार्टीको प्रदेश इन्चार्ज भीम रावल रहेको दाबी गरे ।

ओली समूहका कार्यकर्ताहरुले भीम रावलको नेम प्लेट समेत तोडफोड गरेका थिए ।

यसैबीच, आजै काठमाडौंमा पत्रकार सम्मेलन गर्दै नेकपा एमालेका उपाध्यक्ष तथा सुदूरपश्चिम प्रदेशका संयोजक भीम रावलले प्रदेश कार्यालयमा गरिएको तोडफोडलाई गुण्डागर्दी र अराजकताको संज्ञा दिएका छन् ।

घट्नामा संलग्नहरुलाई अविलम्ब कारबाही गरिनुपर्ने उनले माग गरेका छन् ।


प्रकाशित मितिः २०७७ साल फागुन २६ गते बुधबार, २०:१३