काठमाडौंः महानगरीय प्रहरी परिसर काठमाडौंले नवौँ कोरियन भाषा परीक्षा दिने १३७ नक्कली परीक्षार्थीलाई पक्राउ गरेको छ ।

परिसर अन्तर्गतका विभिन्न वृत्त तथा प्रभागको टोलीले काठमाडौंका विभिन्न परीक्षा केन्द्रबाट उनीहरुलाई आज नियन्त्रणमा लिएको हो ।

परिसरका प्रवक्ता मोहनकुमार थापाले ९ वटा परीक्षा केन्द्रमा अर्को व्यक्तिको परीक्षा दिन राहदानी र प्रवेशपत्रसमेत लिई परीक्षा दिइरहेको अवस्थामा चेकजाँच गर्दा नक्कली परीक्षार्थीलाई पक्राउ गरिएको जानकारी दिए ।

परीक्षा केन्द्र र संख्या

जेभियर इन्टरनेशनल स्कुल बौद्धबाट ५८
गोल्डेनगेट इन्टरनेशनल कलेज वत्तीसपुतलीबाट ७
भिएस निकेतन तिनकुनेबाट १४
नोबेल एकेडेमी नयाँ बानेश्वरबाट १०
युनिभर्सल कलेज मैतीदेवीबाट १६
टाइम्स इन्टरनेशनल कलेज डिल्लीबजारबाट १९
एलआरआई स्कुल कलंकीबाट २
एनकेसिंह मेमोरियल कलेज नयाँ बानेश्वरबाट ८
र ट्रिनिटी इन्टरनेशनल कलेज डिल्लीबजारबाट ३
जनालाई नियन्त्रणमा लिइएको परिसरले जनाएको छ ।


पक्राउ परेकामध्ये १२७ पुरुष र १० महिला रहेका छन् ।

हतियार इजाजतपत्र रद्द

महानगरीय अपराध महाशाखाले हतियार दुरुपयोग गर्ने चार व्यक्तिको हतियार इजाजतपत्र रद्द गरेको छ । महाशाखाले हातहतियार खरखजाना ऐन २०१९ को दफा १० बमोजिम हातहतियार राख्दै आएका काभ्रेका वीरेन्द्रलाल श्रेष्ठ, बलराम सापकोटा, सोलुखुम्बुका आङ्काजी शेर्पा र मोरङका रघुनाथ पुरीको आज हतियार इजाजतपत्र रद्द गरेको हो ।

उनीहरुले ऐनको दफा बमोजिमका शर्त उलंघन गरी सर्वसाधारणलाई डर त्रास उत्पन्न गराउने, हतियार देखाई ठेक्का कब्जा गर्ने, हतियार सवारी साधनमा राखेर हिँड्ने गरेपछि महाशाखाको टोलीले हतियार इजाजतपत्र रद्द गरी हातहतियार बरामद गरेको हो ।