काठमाडौंः कोरोना भाइरस (कोभिड–१९) संक्रमणको जोखिमलाई मध्यनजर गर्दै महानगरीय ट्राफिक प्रहरी महाशाखाले विशेष अभियान थालेको छ ।

महाशाखा लगायत मातहतका ३४ वटा ट्राफिक कार्यालयबाट ट्राफिक प्रहरीहरु परिचालन गरी कोरोनाबाट बच्न सजगता र सचेतनाको लागि प्लेकार्ड देखाउने विशेष अभियान आजदेखि सुरु गरेको छ ।

महाशाखाका प्रमुख प्रहरी वरिष्ठ उपरीक्षक भिम प्रसाद ढकालका अनुसार कोरोना भाइरसबाट सडक प्रयोगकर्ताहरुमा हुने जोखिमलाई मध्यनजर गरी उपत्यकाका मुख्य मुख्य चोक एवम् भिडभाड हुने क्षेत्रमा नागरिकलाई सचेतना जगाउन, सामाजिक दुरीको पालना गराउन तथा सवारी साधनहरुमा हुने भिडभाड कम गराउनका लागि प्लेकार्डसहितको ट्राफिक प्रहरी टोली आजदेखि खटाएको जानकारी दिए ।


यसको लागि प्लेकार्डमा सधैं मास्क लगाएर यात्रा गरौं, जोर विजोर नियम पालना गरौं, सवारी साधनमा सामाजिक दुरी कायम गरौं, जथाभावी हिडँडुल नगरौं र ट्राफिक नियमको पालना गरौं जस्ता कुराहरू लेखिएका छन् ।

महाशाखा तथा मातहतका ट्राफिक कार्यालयहरूवाट काठमाडौं उपत्यकाको ८२ स्थानमा २०० भन्दा बढी ट्राफिक प्रहरीहरु परिचालन गरी यो विशेष अभियान सञ्चालन गरेको महाशाखाका प्रमुख ढकालले बताए । उनले भने, ‘यस विशेष टोलीले सधैं मास्क लगाएर यात्रा गर्न, जोर विजोर नियम पालना गर्न, सामाजिक दुरी कायम गर्न, जथाभावी हिडँडुल नगर्न, भिडभाड गरी नबस्न र यात्रा नगर्नका साथै ट्राफिक नियमको पूर्ण पालना गर्न विशेष अनुरोध गर्नेछन् ।’

आजदेखि दैनिक बिहान ९ बजेदेखि ११ बजेसम्म र दिउँसो ४ बजेदेखि ७ बजेसम्म प्लेकार्ड देखाउने विशेष टोली परिचालन गरिएको महाशाखाका प्रवक्ता प्रहरी उपरीक्षक जिवन कुमार श्रेष्ठले जानकारी दिए । ‘यात्रु तथा सडक प्रयोगकर्ताहरुलाई लक्षित गरी कोरोना भाइरस संक्रमणको जोखिमबाट सुरक्षित रहनको लागि सचेतना अभियानमा ट्राफिक प्रहरी परिचालित गरिएको छ, यसमा नागरिक पनि त्यत्तिकै सचेत हुन जरुरी छ’ श्रेष्ठले भने ।


प्रकाशित मितिः आइतबार, जेठ ३२, २०७७, २१:०२