काठमाडौंः छुट्टाछुट्टै दुर्घटनामा छ जनाको मृत्यु भएको छ भने पाँच जना घाइते भएका छन् ।

रुकुम पश्चिमको आठबिसकोट नगरपालिका ८ दाजेमा शुक्रबार बेलुकी जन्ती सवार जिप दुर्घटना हुदा ४ जनाको मृत्यु भएको छ भने एक जना गम्भीर घाइते भएका छन् ।

मृत्यु हुनेमा स्थानीय ५१ वर्षीय कलीभान नेपाली, ४८ वर्षीय आइते चनारा, ५१ वर्षीय गोरे नेपाली र ६६ वर्षीय सार्के नेपाली रहेका छन् ।

घारीखोलाबाट दाजेतर्फ जन्ती लिएर आउँदै गरेको रा १ ज ५८९ नम्बरको जिप हिजो सडकबाट अन्दाजी १ सय मिटर तल खस्दा उनीहरुको घटनास्थलमै मृत्यु भएको हो ।

घाइते भएका सोही स्थानका लाल बहादुर नेपालीलाई उपचारका लागी नगर अस्पताल आठबिसकोट लगिएको छ ।


।

जिप चालक फरार भएकोले खोजी भइरहेको इलाका प्रहरी कार्यालय आठबिसकोटले जनाएको छ ।

यस्तै, महोत्तरीको शम्सी गाउँपालिका–५ मा शुक्रबार बेलुकी ट्याक्टर दुर्घटना हुँदा एक महिलाको मृत्यु भएको छ भने ४ जना घाइते भएका छन् ।

ट्याक्टरमा सवार भारतिय नागरीक ५० वर्षीया महरियादेवी पण्डितको घटनास्थलमै मृत्यु भएको हो ।

मनराबाट शम्सीतर्फ जाँदै गरेको ना ४त ८५७८ नम्बरको ट्याक्टर आफैं अनियन्त्तित भई पल्टिँदा उनको मृत्यु भएको प्रहरी चौकी पोखरभिण्डाले जनाएको छ ।

घाइते भएका ट्याक्टरमा सवार ४ जनालाई उपचारका लागी जीवनज्योती अस्पताल सम्सी लगिएको छ ।

यसैगरी, उदयपुरको त्रियुगा नगरपालिका–१५ हुवासडहरमा शुक्रबार साँझ ट्याक्टरको ठक्करबाट एक किशोरको मृत्यु भएको छ ।

मृत्यु हुनेमा स्थानीय १६ वर्षीय हिक्मत नेपाली रहेका छन् ।

पबित्रा कन्ट्रक्सनको स १ त ५७९७ नम्बरको ट्याक्टरले सडक पार गर्दै गरेका उनलाई ठक्कर दिँदा उनको घटनास्थलमै मृत्यु भएको हो ।

ट्याक्टर चालक फरार भएकोले खोजी भइरहेको प्रहरी चौकी साउनेले जनाएको छ ।


प्रकाशित मितिः २०७७ साल मंसिर १३ शनिबार, १२:२४