काठमाडौंः छुट्टाछुट्टै स्थानबाट अवैध लागूऔषध सहित १० जना पक्राउ परेका छन् ।

कपिलवस्तुको कृष्णनगर नगरपालिका–२ लिङकगेटबाट करिब ३ किलो अवैध लागूऔषध अफिम जस्तो देखिने बस्तु सहित रुकुम (पश्चिम) वाफिकोट गाउँपालिका–८ दुली बस्ने ३५ वर्षीय लाले भन्ने लाल बहादुर खत्रीलाई मंगलबार दिउँसो प्रहरीले पक्राउ गरेको छ ।

नेपाल भारत सिमामा प्रहरीले जाँच गर्ने क्रममा नेपालबाट भारततर्फ पैदल जाँदै गरेका उनको झोलाबाट उक्त वस्तु सहित फेला पारी उनलाई पक्राउ गरेको हो ।

यसैगरी कपिलवस्तुकै कृष्णनगर नगरपालिका–१ कुकुरभुकुवाबाट नियन्त्रित लागूऔषध २ सय २५ ट्याबलेट नाइट्राजेपाम र ३ सय ट्याब्लेट ट्रामाडोल हाईड्रोक्लोराईड सहित २ जनालाई मंगलबार दिउँसो प्रहरीले पक्राउ गरेको छ ।


पक्राउ पर्नेमा दाङ घोराही उपमहानगरपालिका–३ बस्ने २१ वर्षीय विजय बानिया र सोही उपमहानगरपालिका–१४ बस्ने २१ वर्षीय आकाश गुप्ता रहेका छन् ।

इलाका प्रहरी कार्यालय कृष्णनगर र सशस्त्र प्रहरी बल नेपाल बिओपी कृष्णनगरबाट खटिएको संयुक्त टोलीले भारतबाट नेपालतर्फ आउँदै गरेका उनीहरुलाई जाँच गर्दा उक्त लागूऔषध सहित फेला पारी पक्राउ गरेको हो ।

मकवानपुरको हेटौडा उपमहानगरपालिका–१५ चुरियामाईस्थित सडकबाट नियन्त्रित लागूऔषध २ सय ७५ पिस नाईट्रोभेट र १० बोतल उइनसिरेक्स सहित २ जनालाई मंगलबार दिउँसो प्रहरीले पक्राउ गरेको छ ।

पक्राउ पर्नेमा हेटौंडा उपमहानगरपालिका–११ थाना भर्‍याङ बस्ने ४० वर्षीय सिताराम लामिछाने र सोही उपमहानगरपालिका–१९ बसामाडी बस्ने ३९ वर्षीय दिनेश भण्डारी रहेका छन् ।

वीरगञ्जबाट हेटौंडा बजारतर्फ आउदै गरेको ना २५ प ६९५७ नम्बरको मोटरसाइकललाई इलाका प्रहरी कार्यालय पशुपतिनगरबाट खटिएको प्रहरीले जाँच गर्दा उक्त लागूऔषध सहित फेला पारी मोटरसाइकल चालक लामिछाने र मोटरसाइकलमा सवार भण्डारीलाई पक्राउ गरेको हो ।

यसैगरी मकवानपुरकै हेटौंडा उपमहानगरपालिकाको विभिन्न स्थानबाट नियन्त्रित लागूऔषध सहित ३ जनालाई मंगलबार राति प्रहरीले पक्राउ गरेको छ ।

पक्राउ पर्नेमा सोही उपमहानगरपालिका–१७ हटिया बस्ने २७ वर्षीय दिपेस भुजेल, सोही उपमहानगरपालिका–१० राप्तीरोड बस्ने २६ वर्षीय एलिस श्रेष्ठ र सोही उपमहानगरपालिका–६ गौरिटार बस्ने २३ वर्षीया नम्रता चौलागाई रहेका छन् ।

इलाका प्रहरी कार्यालय पशुपतिनगरबाट खटिएको प्रहरीले भुजेलको साथबाट नियन्त्रित लागूऔषध ९५ पिस नाइट्रोभेट, श्रेष्ठको साथबाट १३ एम्पुल डाइजेपाम, १६ एम्पुल फनारागन, १५ एम्पुल नुर्फिन र चौलागाईको साथबाट ७५ पिस नाइट्राभेट फेला पारेको हो ।

यस्तै, सर्लाहीको लालबन्दी नगरपालिका–१ बागवानीबाट करिब १५ किलो अवैध लागूऔषध गाँजा र धारिलो हतियार तलवार सहित २ जनालाई बुधबार बिहान प्रहरीले पक्राउ गरेको छ ।

पक्राउ पर्नेमा हरिवन नगरपालिका–२ डाबरी बस्ने २० वर्षीय श्रवन महतो र सोही ठाउँ बस्ने १९ वर्षीय बद्री महतो रहेका छन् ।

इलाका प्रहरी कार्यालय नवलपुरबाट खटिएको प्रहरीले डाबरीबाट बागवानी जंगलको बाटो हुँदै आउँदै गरेको प्रदेश २–०३–००१ प ८०६३ नम्बरको मोटरसाइकललाई जाँच गर्दा झोलामा पोका पारी राखेको अवस्थामा उक्त गाँजा र हतियार सहित फेला पारी मोटरसाइकल चालक श्रवन र बद्रीलाई पक्राउ गरेको हो ।

यस सम्बन्धमा स्थानीय प्रहरीले थप अनुसन्धान गरिरहेको छ ।


प्रकाशित मितिः २०७७ साल कार्तिक ५ बुधबार, १६:०७