काठमाडौं, २६ जेठ: वरिष्ठ न्यूरो सर्जन डा. उपेन्द्र देवकोटालाई उनकै इच्छाअनुसार जन्मथलो गोरखा लगिएको छ । पित्तथैलीको क्यान्सरबाट पीडित देवकोटालाई  हेलिकोप्टरबाट बोहोरा गाउँ पुर्‍याइनेछ र पुर्खौली घरमा केहीबेर राखिनेछ ।

डा. देवकाटाले पुर्खौली घरको पीढिमा बस्ने र सिष्नेपानी धाराको पानी खाने इच्छा व्यक्त गरेका थिए । त्यसअनुसार गोरखा लगेर केहीबेरमै फकाइने डा. तारा अधिकारीले जानकारी दिए ।

देवकोटाको बाँसबारीस्थित न्युरो अस्पतालमा उपचार भइरहेको छ । शुक्रबार बेलुकीदेखि उनीबारे अप्रिय कुरा सामाजिक सञ्जालमा भाइरल भएपछि परिवार पीडामा छन् । न्यूरो अस्पतालले शनिबार एक विज्ञप्ति जारी गर्दै देवकोटाबारे सामाजिक सञ्जालहरुमा सम्प्रेषित खबरमा कुनै सत्यता नरहेको र उनको अहिले सघन उपचार भइरहेको प्रष्ट पारेकाे छ ।


पित्तथैलीमा समस्या आएपछि पाँच महिनाअघि देवकोटा बेलायतमा उपचार गर्न गएका थिए । क्यान्सर पुष्टि भएपछि नेपालमै उपचार गर्ने इच्छा व्यक्त गर्दै गत वैशाखमा उनी नेपाल फर्किएका थिए ।