चितवनः बेवारिसे व्यवस्थापन तथा पुनर्जीवन केन्द्र चितवन शाखाले नारायणगढस्थित नारायणी नदी किनारमा बेवारिसे सडक मानिसहरुलाई दशैंको अवसरमा निःशुल्क खाना खुवाइरहेको छ ।

केन्द्रले कार्तिक १ गते घटस्थापनाबाट दोस्रो चरणको खाना खुवाउने अभियान सुरु गरेको हो । अभियानलाई पूर्णिमासम्म सञ्चालन गरिने संस्थाकी संयोजक सीता कुँवरले बताइन् ।

कुँवरका अनुसार हरेक दिन बिहान ११ बजे र बेलुका ६ बजेपछि खाना खानका लागि सडक मानिसहरु आउने गर्छन् । सामाजिक दुरी कायम राख्दै लामबद्ध रुपमा बसेकै ठाउँमा उनीहरुलाई खाना पुर्‍याइन्छ । खाना नारायणी किनारमै पकाउने गरिन्छ ।

भरतपुर महानगर सहयोगापेक्षी सडक मानिसमुक्त महानगरका रुपमा घोषित छ ।


। तर सहयोगापेक्षी सडक मानिसहरु महानगरमा अझै रहेको संयोजक कुँवर बताउँछिन् । ‘खाना खान दैनिक ४०० जनासम्म आउने गर्छन् । जसमध्ये २८५ जना बेवारिसेहरु नै छन् भने अन्यहरुको पहिचान गर्ने काम भइरहेको छ । घरपरिवार भएकाहरुको पहिचान गरेर उनीहरुलाई आफ्नो घरमा पठाउने काम गरिरहेका छौं’ उनले भनिन् ।

विभिन्न व्यक्ति, संघसंस्था र पसलहरुहरुले पनि खाना खुवाउनका लागि आर्थिक सहयोग गरिरहेको उपसंयोजक प्रकाश थापाले बताए । कसैले जन्मदिन, वैवाहिक वर्षगाँठ, कुनै संघसंस्था वार्षिकोत्सको अवसरमा पनि खाना खुवाउनका लागि सहयोग गर्ने गरेको उनको भनाइ छ ।

पहिलो चरणमा सो केन्द्रले भदौ ३ गतेदेखि असोज ५ गतेसम्म निषेधाज्ञाका बेला पनि खाना खुवाएको थियो । पहिलो चरणको खाना खुवाउने अभियानमा लियो क्लब अफ भरतपुर युथले सहकार्य गरेको भएपनि दोस्रो चरणको अभियान केन्द्रले एक्लै चलाइरहेको छ ।






प्रकाशित मितिः २०७७ साल कार्तिक ७ शुक्रबार, ०८:१९