काठमाडौंः नेपाली कांग्रेसले दोस्रो चरणको जागरण अभियानका लागि तय गरेका कार्यक्रमहरु सार्वजनिक गरेको छ ।

बिहीबार पार्टी कार्यालयमा पत्रकार सम्मेलनको आयोजना गर्दै कांग्रेसले जननायक वीपी कोइरालाको १०६ औं जन्म जयन्तीका दिन भदौं २४ गतेदेखि असोज ७ गतेसम्म दोस्रो चरणको जागरण अभियानका लागि तय गरेका कार्यक्रमहरुको जानकारी दिएको हो ।

‘हिमाल, पहाड, तराई–मधेश’ नारा दिएर अगाडि बढेको नेपाली कांग्रेस राष्ट्रिय जागरण अभियानको दोस्रो चरणमा प्रथम चरणमा घोषणा गरिएको १५ वटा उद्देश्यलाई परिमार्जित र समसामयिक विषय दोस्रो चरणको अभियान समेतको हुने प्रवक्ता विश्व प्रकाश शर्माले जानकारी दिए ।


बैशाख २५ मा प्रारम्भ भई जेठ २५ मा समापन भएको प्रथम चरणको जागरण अभियानमा ७७ वटै जिल्लामा केन्द्रीय प्रतिनिधि पठाएको थियो भने दोस्रो चरणमा पूर्व घोषणा अनुरूप ३३० प्रदेश सभा निर्वाचन क्षेत्र केन्द्रीत अभियान सम्पन्न गरिने जानकारी शर्माले दिए । जस अनुरूप हरेक क्षेत्रमा एकका दरले ३३० केन्द्रीय प्रतिनिधि खटिने बताइएको छ ।

कांग्रेसले यस अभियानमा ठूला (केजीमा तौलिने) माला एवं व्याज रहित बनाउने, एक मिनेटमा आसन ग्रहणको कार्यक्रम सक्ने, सिमित वक्ता हुने र बोल्ने भन्दा सुन्ने कार्यलाई बढि जोड दिने बताएको छ ।

कार्यक्रम अन्तरगत भाद्र २४ गते उद्घाटन समारोह गर्दै क्रमश अरु दिनहरुमा स्थानीय तहमा विजयी र उम्मेदवार साथीहरू तथा पार्टी बीच छलफल, वडा स्तरीय विशेष अन्र्तक्रिया कार्यक्रम, पार्टी प्रवेशका कार्यक्रमहरू असोज ३ गते संविधान दिवसका कार्यक्रमहरू गर्ने र अन्तिम दिन असोज ७ गते जिल्ला स्तरीय प्रदर्शनमा सबै तहको एकीकृत सहभागिता रहने जनाइएको छ ।

यी हुन् जागरण अभियानका १५ उद्देश्य:

(१) राष्ट्रव्यापी रुपमा पार्टी पक्तिमा सांगठनिक गति, एकता, समन्वय र हार्दिकता अभिवृद्धि गर्र्दै पार्टी सुदृढिकरणका विविध गतिविधि अघि बढाउदै पार्टी पंक्तिमा जागरण अभिवृद्धि गर्न । यस क्रममा नेपाली कांग्रेससँग एकीकरण भएको तत्कालीन नेपाल लोकतान्त्रिक फोरमका विभिन्न तहका साथीहरू एवं अन्य दलबाट प्रवेश गर्नु भएका साथीहरूसँग व्यवहारिक र भावनात्मक समन्वय अभिवृद्धि गर्दै पार्टीलाई सबल बनाउँदै अघि बढ्ने ।

(२) कम्युनिष्ट सरकार बनेको दुई वर्ष समेत नपुग्दै नेपाली समाजमा जे जस्तो असन्तुष्टि, निराशा र वितृष्णाको संकेत देखिएको छ त्यसलाई गम्भीरतापूर्वक लिंदै सामाजिक संवादको माध्यमबाट समस्त जनताको विचार भावना साक्षात्कार गर्न ।

(३) नेपाली कांग्रेसको नेतृत्वमा मुलुकले विगतमा हासिल गरेको राजनैतिक उपलव्धी एवं समृद्धिको दिशामा गरिएका काम नागरिक पंक्तिमा ब्यापक ढंगले सम्प्रेषण गर्न ।

(४) वर्तमान सरकारका अनेक भ्रष्टाचार लगायत विसँगतिपूर्ण जनविरोधि कृयाकलाप बारे सविस्तार विवरण आम नागरिकमा व्यापक ढंगले प्रष्ट्याउन । (वाइड वडी, न्यारो वडी लगायत नेपाल वायुसेवा निगममा भएका भ्रष्टचार एवं भ्रष्टाचारका अन्य प्रकरणहरू)

(५) नेपाली समाजमा रहेका अनेक फरक मत, संविधान या राज्यप्रणाली बारेकै विमतिहरु समेतलाई राष्ट्रिय एकताको सुत्रमा गाँस्न आवश्यक छलफल र बहष विभिन्न स्तरमा अघि वढाउन ।

(६) जनता, मतदाता र नेपाली कांग्रेस पार्टीको विभिन्न तहको नेतृत्व र सदस्यहरुबीचको सम्बन्धलाई जीवन्त र घनिष्ट बनाउन जनताका अनेक मुद्दामा अग्रसरता लिएर जनताको हितमा पार्टीलाई थप समर्पित गराउन ।

(७) तराई–मधेश लगायत मुलुकको कतिपय भू–भागमा रहेका असन्तुष्टिहरुको समाधान सूत्र विगतमा नेपाली कांग्रेसको नेतृत्वको सरकारले अघि बढाएको संविधान संशोधनको प्रस्ताव नै हो, भन्ने तथ्यलाई आम नागरिकबीचमा प्रस्ट्याउँदै लोकतान्त्रिक संविधानप्रतिको जनविश्वासलाई दिगो बनाउँदै अघि बढ्ने ।

(८) मुलुकको वर्तमान राजनैतिक, सामाजिक, प्रशासनिक एवं कुटनैतिक सम्बन्ध आदि बारे नेपाली बौद्धिक क्षेत्रसँग विशेष अन्तरक्रिया र सैद्धान्तिक सहकार्य अघि बढाउन ।

(९) तिनै तहका सरकारलाई नागरिक हित र मुलुकको समृद्धि सम्वन्धमा निर्वाचनमा मतदातालाई दिलाएको विश्वास बमोजिम कार्य गर्न अपिल गर्दै आवश्यक दबाव बढाउन ।

(१०) नेपाली समाजमा केही समय यता भइरहेका “निर्मला पन्त” प्रकरण झै महिला हिंसाका अनेक घटना र प्रवृतिका विरुद्ध जनचेतना अभिवृद्धि गरी महिला सम्मान र सुरक्षा अभिवृद्धि गर्न/गराउन ।

(११) नेपाली समाजमा कतिपय ठाउँमा रहेका बोक्सी प्रथा देखि छाउपडि सम्मका अनेकौं सामाजिक विसंगतिको अन्त्यका लागि सार्थक छलफल र पहदकदमी अघि बढाउन ।

(१२) भुकम्प, हावाहुरी, आगलागी, बाढी र अनेक विपदमा भएको धनजनको क्षतिमा प्रभावकारी उद्धार र पुनस्र्थापना अभियानलाई सघाउन तथा यस्तो संभावित विपदमा सर्तकता साथ काम गर्ने “स्वयंसेवी समुह” निर्माणको छलफल प्रारम्भ गर्ने ।

(१३) स्वदेशसँगै विदेशमा रहेका पचास लाखभन्दा बढी नेपालीसँग आफ्नो मातृभूमिमा लोकतन्त्रको रक्षा, संघीयताको सम्बद्र्धन र समृद्धिमा सहभागीताका लागि विशेष संवाद र जागरुकता अभिवृद्धि गर्न तथा तिनको मताधिकार प्रवन्ध गर्न सर्वोच्च अदालतले सरकारलाई गरेको आदेश कार्यान्वयनका लागि दवाव बढाउन तथा वैदेशिक रोजगारीका क्रममा पछिल्लो समय बढेका बेथितीहरु अन्त्यका लागि दबाब बढाउँदै र श्रमिक नेपाली युवाहरुको पीडामा मल्हम लगाउन ।

(१४) कम्युनिष्ट पार्टीको सरकार बनेयता प्रेस स्वतन्त्रता माथि बढेको हस्तक्षेप, अभिव्यक्ति स्वतन्त्रता कुण्ठीत गर्ने अनेक प्रयत्न आदिका विरुद्ध नेपाली प्रेस जगतसंग सहकार्य गर्दै प्रमुख प्रतिपक्षी दलका नाताले प्रेस स्वतन्त्रताको रक्षाका लागि खबरदारी गर्न ।

(१५) नेपाली कांग्रेसमा समाहित हुन चाहनेहरूलाई पार्टीमा स्वागत गर्दै नयाँ सदस्यताको व्यापक वितरण गर्दै पार्टीको विभिन्न तहका लागि आवश्यक प्रशिक्षणको पूर्व तयारी गर्ने ।

 


प्रकाशित मितिः बिहीबार, भदौ १९, १५:२२