काठमाडौंः आफूलाई प्रहरी हुँ भन्दै काठमाडौं उपत्यकाका विभिन्न व्यवसायी लगायतका मानिसहरुलाई अनुचित प्रभावमा पारी आर्थिक लाभ लिएको अभियोगमा काठमाडौं टोखा नगरपालिका–८ बाँनियाटार बस्ने रामेछाप खाँडादेवी गाउँपालिका–६ घर भएका २८ वर्षीय गोबिन्द खड्कालाई आज प्रहरीले पक्राउ गरेको छ ।

विगत २ वर्षदेखि प्रहरीको सञ्चार सेट जस्तो देखिने र हेण्ड वाकिटकी सञ्चार सेटहरु बोकी ट्राफिक प्रहरीको यूनिफर्मको रेनकोट, प्रहरीको टिसर्ट, नेमप्लेट लगाई रातको समयमा रात्रीकालीन व्यवसाय संचालन गर्ने स्थानहरुमा गई खड्काले व्यवसायीलाई अनुचित प्रभावमा पारी आर्थिक लाभ लिएको भन्ने विशेष सूचनाको आधारमा महानगरीय अपराध महाशाखाबाट खटिएको प्रहरीले उनलाई काठमाडौं टोखा नगरपालिका–८ बाँनियाटारबाट पक्राउ गरेको महाशाखाका प्रवक्ता एवं सूचना अधिकारी प्रहरी उपरीक्षक इश्वर कार्कीले जानकारी दिए ।


उनको साथबाट २ थान सञ्चार सेट, १ थान गोबिन्द खड्का लेखिएको नेमप्लेट, नेपाल प्रहरी लगायत अन्य सुरक्षा निकायको जस्तो देखिने यूनिफर्महरु, २ जोर बुट, १ थान मतदाता परिचयपत्र, १ थान सिठि, बा ७८ प १६२ नम्बरको मोटरसाइकल, १ थान सवारी चालक अनुमति पत्र र ४ थान विभिन्न ब्राण्डको मोबाइल प्रहरीले बरामद गरेको उनले बताए ।

उनलाई थप अनुसन्धानका लागि महानगरीय प्रहरी परिसर काठमाडौं पठाइएको छ ।


प्रकाशित मितिः २०७७ साल असोज २९ बिहीबार, २०:०९