रौतहटः रौतहट हत्याकाण्डका फरार रहेका राजपुर नगरपालिका–४ बस्ने ५५ वर्षीय मो. महताव आलमलाई सोमबार प्रहरीले पक्राउ गरेको छ ।

२ नम्बर प्रदेश प्रहरी कार्यालय जनकपुरधाम धनुषाबाट खटिएको प्रहरीले उनलाई रौतहट बौधीमाई नगरपालिका–७ बड्की बंकुलबाट पक्राउ गरेको हो ।

२०६४ चैत २८ गते भएको संविधान सभाको चुनावलाई लक्षित गरी धाँधली गरी जित्नका लागि चैत २७ गते साँझ साविक राजपुर फरदहवा गाविस–४ हाल राजपुर नगरपालिका–४ स्थित शेख इद्रिशको गोठ घरमा विष्फोटक पदार्थ स्टोर गरी बम बनाउने क्रममा बम विष्फोट हुँदा पिन्टु भन्ने त्रिलोक प्रताप सिंह ताजपुत समेत १५/१६ जना घाइते तथा २/३ जनाको मृत्यु भएको थियो ।


मृतक तथा घाइतेहरुलाई ट्याक्टरमा लोड गरी नजिकै रहेको इँटाभट्टामा लगि जलाईएको घटनामा संलग्न रही आलम फरार रहेका थिए ।

प्रारम्भिक अनुसन्धानमा महतावले आफ्नो दाइ मो. अफताव आलमको निर्देशनमा घटना लुकाउने उद्देश्यले विष्फोटमा परी मृत्यु तथा घाइते भएका मानिसहरुलाई ट्याक्टरमा राखि इँटाभट्टामा जलाएको स्वीकार गरेको खुल्न आएको २ नम्बर प्रदेश प्रहरी कार्यालय जनकपुरधाम धनुषाले जनाएको छ ।


प्रकाशित मितिः २०७७ साल मंसिर २२ सोमबार, १७:०७