काठमाडौंः प्रहरीले विभिन्न ठाउँबाट अवैध लागूऔषध सहित दुई जनालाई पक्राउ गरेको छ ।

काठमाडौं चाबहिल बस्ने सर्लाही केसरजङ्ग नगरपालिका–९ घर भएका २६ वर्षीय आकाश दाहाललाई नियन्त्रित लागूऔषध नाइट्रोभेट ६ सय ट्याब्लेट, २ थान ल्यापटप र ३ थान क्यामेरा सहित शुक्रबार दिउँसो प्रहरीले पक्राउ गरेको छ ।

विशेष सूचनाको आधारमा महानगरीय प्रहरी वृत्त बानेश्‍वरबाट खटिएको प्रहरीले दाहाललाई काठमाडौं महानगरपालिका–१० पुरानो बानेश्वर सेतोपुलबाट नियन्त्रित लागूऔषध नाइट्रोभेट ३ सय ट्याब्लेट सहित फेला पारी पक्राउ गरेको र अनुसन्धानको क्रममा निजको कोठाबाट थप ३ सय ट्याब्लेट नाइट्रोभेट, ल्यापटप र क्यामेरा फेला पारेको हो ।


यसैगरी, बाँकेको नेपालगञ्ज उपमहानगरपालिका–२ पुष्पलाल चोकस्थित नागरिक गेष्ट हाउसको कोठा नम्बर १०२ मा बस्ने सुर्खेत वीरेन्द्रनगर नगरपालिका–२ बस्ने २२ वर्षीय सुनील बोहरालाई करिब १२ ग्राम ५ सय मिलिग्राम अवैध लागूऔषध ब्राउनसुगर जस्तो देखिने खैरो पदार्थ सहित शुक्रबार दिउँसो प्रहरीले पक्राउ गरेको छ ।

जिल्ला प्रहरी कार्यालय बाँके र लागूऔषध नियन्त्रण व्यूरो नेपालगञ्जबाट खटिएको प्रहरीले बोहरा बसेको कोठा तलासी गर्दा उक्त परिमाणको लागूऔषध फेला पारी उनलाई पक्राउ गरेको हो ।

यसैगरी, मकवानपुरको राक्सीराङ गाउँपालिका–३ औले डाँडाबाट करिब २२ किलो अवैध लागूऔषध चरेश बनाउन प्रयोग गरिने गाँजाको धुलो शुक्रबार दिउँसो प्रहरीले बरामद गरेको छ ।

प्रहरी चौकी चैनपुरबाट खटिएको प्रहरीलाई देख्नासाथ अपरिचित २ जना पुरुषले झोला छाडी फरार भएपश्चात प्रहरीले झोला जाँच गर्दा उक्त परिणामको धुलो फेला पारेको हो ।

यस सम्बन्धमा स्थानीय प्रहरीले थप अनुसन्धान गरिरहेको छ ।


प्रकाशित मितिः २०७७ साल मंसिर १३ शनिबार, १८:१७