काठमाडौंः सशस्त्र प्रहरी महानिरीक्षक शैलेन्द्र खनालले पाँचौ समुहको ‘एपीएफ कमाण्ड तथा स्टाफ कोर्ष’को आज समापन गरेका छन् ।

सशस्त्र प्रहरी बल, नेपाल प्रधान कार्यालय हल्चोक स्वयम्भुमा आयोजित बिशेष समारोहमा सशस्त्र प्रहरी महानिरीक्षक खनालले सो कोर्षमा
सर्वोत्कृष्ट हुनुकासाथै रिसर्चतर्फ समेत उत्कृष्ट हुनु भएका सशस्त्र प्रहरी नायव उपरीक्षक रमेश बिक्रम शाहीलाई ‘बेस्ट कमाण्ड एण्ड स्टाफ
कोर्ष अवार्ड’ तथा ‘बेष्ट रिसर्च अवार्ड’ प्रदान गरे ।

सोही अवसरमा त्रिभुवन विश्वविद्यालय मानविकी तथा सामाजिकशास्त्र संकायका डिन प्रा.डा. कुशुम शाक्यले सशस्त्र प्रहरी नायव उपरीक्षक रमेश विक्रम शाहीलाई ‘वेष्ट एकेडेमीक अवार्ड’ प्रदान गरे ।


सशस्त्र प्रहरी महानिरीक्षक शैलेन्द्र खनाल र त्रिभुवन विश्वविद्यालय मानविकी तथा सामाजिकशास्त्र संकायका डिन प्रा.डा. कुशुम शाक्यले सोही विशेष समारोहमा एपीएफ कमाण्ड तथा स्टाफ कलेज जर्नलको लोकार्पण समेत गरे ।

सशस्त्र प्रहरी महानिरीक्षक खनालले सो अवसरमा उक्त कोर्ष सफलता पूर्वक सम्पन्न गरेका मध्यम तहका एपीएफ अधिकृतहरुले भोलिका दिनमा सांगठानिक जिम्मेवारी निर्वाहका क्षेत्रहरुमा पूर्ण व्यावसायिक भई कुशल क्षमता प्रदर्शन गर्ने विश्वास व्यक्त गरे ।

उनले आगामी दिनमा संगठनको नेतृत्व तहमा पुग्न सो कोर्ष फलदायी रहने चर्चा गर्दै दिक्षित अधिकृतहरुले प्राप्त गरेका ज्ञान, सिप, कला र
कौशललाई सदुयोग गर्दै सांगठानिक विकासमा समेत योगदान पुर्‍याउँदै राष्ट्रिय तथा अन्तर्राष्ट्रिय स्तरमा समेत उत्कृष्ट कार्य सम्पादन गर्न सक्षम रहने बताए ।

सशस्त्र प्रहरी महानिरीक्षक खनालले नेपाल सरकारको ‘समृद्ध नेपाल सुखी नेपाली’को महान अभियान साकार पार्न सबैले आ–आफ्नो ठाउँबाट संवेदनशिल भई योगदान पुर्‍याउनु पर्ने उल्लेख गर्दै राष्ट्रसेवक सशस्त्र प्रहरी कर्मचारीहरुलाई देश र जनताको सेवा, सुरक्षा तथा सहयोग एवं आपत विपद्मा परेकाहरुको उद्वार कार्यमा पूर्ण व्यावसायिक भई कार्यक्षेत्रमा निरन्तर कृयाशिल रहन निर्देशन समेत दिए ।

उनले एपीएफ कमाण्ड तथा स्टाफ कोर्षलाई सफलतापूर्वक संचालन गर्न नेपाल सरकार गृह मन्त्रालय, त्रिभुवन विश्वविद्यालय लगायत सम्बद्ध अन्य विभिन्न निकाय तथा विज्ञहरुबाट प्राप्त सहयोग प्रति आभार प्रकट गरे ।

त्रिभुवन विश्वविद्यालय मानविकी तथा सामाजिक शास्त्र संकायका डिन प्रा.डा. कुशुम शाक्यले शिक्षा आर्जन गर्न सदैव सकृय रहनुपर्ने चर्चा गर्दै
दक्ष अधिकृत उत्पादनमा एपीएफ कमाण्ड तथा स्टाफ कोर्ष कोशे ढुंगा सावित रहने विश्वास व्यक्त गरे ।

उनले दिक्षित अधिकृतहरुलाई कार्यक्षेत्रमा सफलताको कामना गर्दै भोलिका दिनमा आउनसक्ने सुरक्षा चुनौतीहरु परास्त गर्दै उत्कृष्ट
कार्यसम्पादन तथा कुशल नेतृत्व प्रर्दशन गरी व्यावसायिक जिम्मेवारी निर्वाहमा तालिमबाट प्राप्त ज्ञान उपयोगी रहने बताए ।

उक्त कोर्ष त्रिभुवन विश्वविद्यालय मानविकी तथा सामाजिक शास्त्र संकायमा सुरक्षा, विकास तथा शान्ति अध्ययनमा स्नातकोत्तर रहेको कुरा कार्यक्रममा जानकारी गराईएको थियो ।

गत साल भदौ १५ गतेबाट संचालित १६ महिना अवधिको सो कोर्षमा ४ जना सशस्त्र प्रहरी उपरीक्षक, १४ जना सशस्त्र प्रहरी नायव उपरीक्षक र १ जना प्रमुख अनुसन्धान अधिकृत गरी कुल १९ जना अधिकृतहरु सहभागी रहेका थिए ।

सो कोर्षमा सहभागी अधिृकतहरुलाई स्टाफ ड्युटीज, इन्टेलिजेन्स, द्वन्द्व व्यवस्थापन, सुरक्षा, विकास, शान्ति, मानवअधिकार, अन्तर्राष्ट्रिय मानवीय कानून, नेतृत्व तथा व्यवस्थापन, राष्ट्रिय सुरक्षा रणनीति, नीतिनिर्माण तथा योजना लगायतका विविध विषयहरुमा सम्बन्धित विषयका विज्ञहरुद्वारा अध्यापन गराईएको कुरा त्यसअवसरमा जानकारी गराइएको थियो ।

उक्त विशेष समारोहमा अवकाश प्राप्त सशस्त्र प्रहरी महानिरीक्षकद्वय सनतकुमार बस्नेत र दुर्जकुमार राई लगायत गृहमन्त्रालय, नेपाली सेना,
नेपाल प्रहरी र सशस्त्र प्रहरी बल, नेपालका बरिष्ठ अधिकृतहरुको समेत उपस्थिती रहेको थियो ।


प्रकाशित मितिः २०७७ साल पुस ३ गते शुक्रबार, २०:१०