बाग्लुङः गलकोट नगरपालिका–७ मल्म दाग्दीखोलादेखि वडा नम्बर ११ रिघा गोठलाङसम्मको गोरेटो बाटो मर्मत सम्भार गरिएको छ ।

भर्‍याङ सामुदािक वन उपभोक्ता समूह गलकोट नगरपालिकाका ७, १० र ११ वडाका उपभोक्ताहरुको जनश्रमदान मार्फत झण्डै ४ किलोमिटर गोरेटो बाटो मर्मत सम्भार गरिएको सामुदायिक वन उपभोक्ता समितीका अध्यक्ष ज्ञान बहादुर कार्कीले जानकारी दिए ।

भर्‍याङ सामुदायिक वनको सक्रियतामा प्रत्येक वर्ष हरितालिका तीजको पूर्व सन्ध्यामा उक्त गोरेटो बाटो मर्मत सम्भार गरिँदै आएको सामुदायिक वन उपभोक्ता समितिका सचिव छममाया पुन काउचाले जानकारी दिइन् ।

साविकको पाण्डवखानी, रिघा र मल्म गाविसका विभिन्न वडा बाट गरी ४५ जना स्थानीयको सक्रियतामा उक्त कार्य सम्पन्न गरिएको सचिव काउचाले बताइन् ।


बर्खायाम सँगैको निरन्तरको वर्षाले गोरेटो बाटोको ठाउँ ठाउँमा बनेका खाल्डा खुल्डी मर्मत सँगै झाडी समेत सफाई गरिएको बताइएको छ । गोरेटो बाटो मर्मत गरे सँगै साविकका ३ गाविस रिघा, पाण्डवखानी र मल्मका स्थानीय बासिन्दालाई पैदल यात्रा गर्न सहज भएको छ ।

  • थम्मन थापा

प्रकाशित मितिः शनिबार, साउन ३१, २०७७, १९:०४