काठमाडौंः संघीय संसद्अन्तर्गत प्रतिनिधिसभाको विनियोजन विधेयक, २०७५ को विभिन्न शीर्षकमाथि तीन मन्त्रालयका विभिन्न शीर्षकमाथि छलफल भएको छ ।

प्रतिनिधिसभाको आजको बैठकमा ऊर्जा, जलस्रोत तथा सिँचाइ मन्त्रालय, परराष्ट्र मन्त्रालय र गृहमन्त्रालयको विभिन्न शीर्षकमाथि छलफलमा सांसदहरुले आ–आफ्नो धारणा राखेका छन् ।

नेपाली कांग्रेसका सांसद देवप्रसाद तिमिल्सिनाले प्रभावशाली नेताहरुका क्षेत्रमा विकास गरेर मात्र मुलुकको समृद्ध हासिल नहुने भन्दै प्रदेश नं २ बजेट विनियोजन गर्दा पूर्वग्राही देखिएको आरोप लगाए । उहाँले तराईमा सिँचाइ र डुबानको समस्याबारे सरकारको ध्यानाकर्षण गराउँदै समयमै सम्बोधन गर्न आग्रह गरे ।


नेपाली कांग्रेस दाचुर्लाका सांसद दिलेन्द्र प्रसाद वडुले आफ्नो जिल्लामा कुनै योजना नपरेकोमा व्याङ्ग गर्दै सरकारलाई धन्यवाद दिएका छन् । उनले यथार्थ अवस्था के हो ? कुनै जिल्लामा सयौ योजना छन् कसैमा शुन्य भन्दै न्यायपूर्ण वितरणको लागि आग्रह गरेका छन् ।

नेपाल कम्युनिष्ट पार्टी नेकपा का सांसद नवराज सिलवालले सुरक्षा क्षेत्रमा पुनःसंरचनाको आवश्यकता औल्याउँदै सुरक्षा चुस्त र मजबुत बनाउन सके त्यसको सकारात्मक प्रभाव सबै क्षेत्रमा पर्ने भन्दै आठ अर्ब जरिवाना उठाउन बाँकी भएको अवस्थामा सरकारले आवश्यक योजना ल्याउनुपयो र कर्मचारी परिचालन गर्नुपर्ने जरुरी रहेको बताए ।

नेपाली कांग्रेसका सांसद् सन्जय कुमार गौतमले किन हामीले ३ तहका संरचना बनायौं के का लागि समान बिकास र बितरणको लागि होइन भन्दै प्रतिप्रश्न गरेका छन् । बिचारको दृष्टिकोणले किन फरक देखियो यो नहुनु पर्ने हो । यसले नव निमार्णमा जाने भनेको सरकारलाई घाटा पुग्ने देखिन्छ । समान वितरण र जनताको भावना समेट्न नसक्ने हो भने परिर्वतन के का लागि भन्दै ध्यानाकर्षण गराए ।

नेकपाका सांसद पुष्पाकुमारी कायस्थ कर्णले केन्द्रीय राजधानीमा ९ बजे बजार बन्द हुने हालको अवस्थामा सुधार गरी रात्रिकालीन व्यवसाय र फुटपाथ व्यापारलाई प्रवद्र्धन गर्ने कार्यक्रम ल्याउन सुझाव दिएका छन् ।

नेपाली कांग्रेसका सांसद पद्मनारायण चौधरीले नेपाल प्राकृतिक ऊर्जा स्रोतमा धनी भए पनि समयमा सोच बनाउन नसक्दा गरीब भएको उल्लेख गर्दै कृषिमा सिँचाइको उपयुक्त व्यवस्था गरी आत्मनिर्भर हुन सकिने बताए ।

नेकपाका सांसद नवराज रावतले वीरेन्द्रनगर ग्रामीण विद्युतीकरण कार्यक्रम समावेश गरी उपयुक्त बजेटको व्यवस्था गर्न माग गर्दै कोहलपुर–सुर्खेत प्रसारण लाइन समयमै निर्माण गर्नुपर्ने बताए ।

नेकपाका सांसद मोहन बानियाँले जनमाफियाहरुले दर्तामात्र गरेका जलविद्युत् कम्पनीलाई खारेज गरी सरकारले सातै प्रदेशमा ठूला जलविद्युत् आयोजना निर्माण गर्नुपर्ने उल्लेख गर्दै जल र ऊर्जा क्षेत्रका कार्यक्रमलाई प्रोत्साहन गरी दुर्गम क्षेत्रमा विद्युत् विस्तार गर्नुपर्ने बताए।

नेपाली काँग्रेसका सांसद सीताराम महतोले तराईको हुलाकी राजमार्ग समयमै निर्माण सम्पन्न गर्न पर्याप्त बजेटको व्यवस्था गर्न माग गरेकी छन्।